【久噏波】
琴晚睇完《珠峰浩劫》，
套戲前半段嘅節奏有啲難捉摸，
跳躍力高過你玩彈床。
而一大堆人名出現，
譯名關係你都知中文的話好難記，
最正係同一個人前後有兩個譯名出現，
都需要少少時間先ketchup到。
故事嘅發展唔難捉摸，
亦無一啲要令佢地一下冚包散的驚世大場面。
但因為係真人真事改編，
感覺到的係一份親切而唔係負擔。
如果你負擔得起少少錢，
強烈建議睇震震櫈。
無抱期望入去睇，
自然無乜失望感。
但成套戲最吸引眼球的，
一定係拍珠峰的鏡頭。
個種無敵是最寂寞的氣場，
有如女神一樣時刻保持2秒距離的感覺。
遠遠望落去好靜止，
但當你實實在在雙腳踩喺上面行的時候每秒都在變化的對比，
只能說又要驚又要飲椰青。
睇完後戲院著燈一刻，
阿媽問我會唔會咁做，
有朝一日去攻頂﹖
我諗左一諗，
發現近期做運動後好知道自己喺體能上係易放棄的人，
所以唔存在靠求生意志喺逆境生存落黎的能力，
我係會死。
但⋯
冒險唔是要去到咁盡下下攻珠峰頂。
歐洲的流浪、
三山五嶽、
跳傘潛水⋯
還是要去。
2012年攝於珠峰大本營
Search